أمنياتي

عارفين المترو بتاع مصر الجديدة ؟

الكبير اللي طول ما هو ماشي يحسسك إنه بيعمل حوادث دا

اللي الشباك بتاعه أكبر م الكرسي اللي بتبقي قاعد عليه

معرفتوش برضو ؟؟ 

هو دا 

هو شبه التروماي من بعيد D:

انا بقى بحبه جداااااااا

طول ما إنت ماشي بيه بيطلع وينزل وينزل ويطلع و ياسلام لو فـ الشتا

الشبابيك دايماً مفتوحة ومبتتقفلش D: وشوية هوا فوق الفظيع 

نفسي اركبه كل يوم وفـ كل مشوار

بس للأسف مش كل مشاويري ف مصر الجديدة :(( 

دي أول أمنيه D:

تاني امنيه بقى البيت

ماهو لازم الواحد يفكر فـ مستقبله برضو وهيعيش فين وكدة D:

وانتوا ماشيين بنفس المترو اللي فوق دا

آه صح دا إنتوا

وإنتوا ماشيين فـ مصر الجديدة .. هتلاقوا بيوت ع الشارع كدة بس قديمة اووووي

إللي هي بلكونات كبيرة جدا وشيش

عارفين النظام القديم دا ؟

بلاش .. بيت جدك الله يرحمه D:

شايف الستايل دا ؟ انا نفسي اعيش فيه ^_^

بيت قديم كدة وشكله هيقع بس متين برضو D:

والسقف عالي جدا والبلكونة عبارة عن اوضة مش بلكونه D:

مش حُباً فـ الوسع مثلا .. بس حباً فـ التراث

 البيوت اللي زي دي اه هتلاقيها فـ اماكن كتير غير مصر الجديدة بس عشان اخر بيت شوفته من النوع دا كان فـ مصر الجديدة جبت سيرتها يعني وكمان البيوت دي غالية جدا

لكن وإنت جواها هتحس بإحساس مختلف تماماً لما تُعد فـ مودرن اوي

هتحس بالراحة :/ 

أو ع الاقل انا هحس بالراحة 

ننتقل للأمنيه التالتة 

نفسي ازور الحُسين .. شارع الحُسين يعني

انا زورته كذا مرة بس كنت صغيرة :(

عايزة ازوروا وارجع البيت الساعة 12 أو 1 بليل مثلا ^_^

ومن هناك اجيب كل الاكسسوارات والانتيكات

آه اصل يا الحُسين يا بلاش D:

لحد دلوقتي الاماني ممكنة إلى حد ما 

الامنية الرابعة بقى

نفسي ألبس إسود فـ إسود ومسمعش كومنت حد عليه

اه انا بجد صعوبة اني البس الجزمة سودا والبنطلون اسود والبادي او الجاكيت اسود والطرحة والباندانا اللي تحتيها إسود .. عشان ماما وبابا بيقولولي متلبسيش اسود :|

فـ تحولت الرغبة دي لأمنيه صعب تحقيقها حتى الان ع الاقل

رابع امنيه 

إني اجيب بتاع 15 أو 20 بلونة

وافرقعهم كلهم بـ دبابيس ^___^

دي أمنيه عيالي اوي بس وانا عيلة معملتهاش :( فـ عايزة اعملها دلوقتي D:

خامس امنيه نفسي اشوف صاروخ بيولع ومتخضش :/ ومسيري هعملها فـ يوم إني اولع صاروخ ومتخضش D:

سادس امنيه اركب الصاروخ او قطر الموت اللي فـ الملاهي D: 

ممكن متصدقوش بس بجد مركبتوش ولا مرة :/

سابع امنيه نفسي اروح اسكندرية -.-" بقالي 3 سنين مروحتهاش يا جدعان مش معقول كدة !
ولما اروح معدش عند البحر وبس كدة .. انا مش هروح اصيف اصلا
انا عايزة اروح اكتشف البلد .. أصور او اتصور فـ الشوارع ^_^

آخر أمنيه بقى .. نفسي اجيب جزمة بـ كعب 8 أو 9 سنتي متر D:

والامنيات مش مترتبه دا على حسب ورودها فـ دماغي D:

وإن شاء الله لو في اماني تانية هبقى اكتبها هنا ^^