بعد تجربة شخصية حبتين عرفت إن أغلب الناس بتحب تعيش فـ دور المثالية
وخصوصاً وهما بينصحوا
وإن أكبر غلطة ممكن ترتكبها فـ مشكلة عندك إنك تروح تاخد رأي حد فيها
لان رؤيته عمرها ما هتبقى زي رؤيتك ف المشكلة دي , هو بعيد تماماً عن المشكلة, وبرضو في احداثيات كتير مش هتقدر تقولهاله زي ما انت حاسسها , المهم إن اللت والعجن مع ناس بعيدة عن المشكلة باعتبارهم اشخاص محايدة دا فـ حد ذاته غلط, وبيزود الحيرة واصلاً طبيعة الانسان مبتقبلش النصيحة او بتعاند, حاجة كدة رباني
وإن في ناس كتير مبتقاش فاهمة المشكلة اصلاً, فبتدأ تجبلك حلول متتفهمش او تبريرات مش مُبررة اصلاً
وفي ناس تانيه بتبقى فاهمة و واعية بس عايزة تريحّك إنت وبس, عشان تفضل تشتكيلهم وشايفهم العقل الكبير
وفي ناس بتقولك وجهة نظرها الشخصية اللي كتير بتتعارض مع عقليتك
وفي ناس بتديك الحق ! حتى لو كان بيوجع, الناس دي غالباً بتبقى الصح , بس مش دايماً ومش في كل المواقف
وفي ناس تانيه بتتعامل مع المشكلة اياً كانت على انها حاجة تافهة تقدر تتخطاها لو قررت دا , وبتحط الحِمل كله عليك وبتحملك مسؤوليه تجاوز المشكلة بنسيانها او التغاضي عنها, ودول اكتر ناس مرييحين دماغهم ودول كتير على فكرة
وفي ناس هتغلطك وهتفوقك بكلمتين وتحطك على اول الطريق وتسيبك وتمشي, بتفوقك عشان تسيبلك مساحة تختار بنفسك من غير ما تفرض عليك بس بتساعدك الاول بإنها تفوقك وتوريك الصورة كاملة
عند واحد بس من كل الناس دي الحل اللي هيريحك, بس أنهي واحد فيهم ؟! ومين اللي هيختار ومين اللي هيعرف إنه دا الحل المناسب ؟
وبعدين في مشاكل ملهاش حل , وعايزة حد عقلاني اوي عشان يوصل لنقطة وسط , كل الناس اللي فوق دي كلامها هيبقى غير مُجدي في المشاكل اللي زي دي
بس في ناس بتبقى عارفة حل مشاكلهم إيه بس مترددين, وبيروحوا يستشيروا عشان يتأكدوا إن هُما صح ويبدأوا ينفذوا الحل دا , ودول هيتعبوا أوي اول ما يشوفوا الاثار الجانبيه بتاعة تنفيذ الحل دا
ليه كل اللي بينصحوا مش بيجربوا يحطوا نفسهم بجد مكان الاشخاص طالبة النصيحة ؟ ويتخيلوا الموقف بتجسيده باشخاص من حياتهم الشخصية, ويشوفوا هيتصرفوا ازاي, واغلب الظن إن حلهم ساعتها هيبقى "مش عارف" بجد !
لكن متبصش عالمعطيات والحل الاجدر وتقوله
في حسابات كتير المفروض تاخد بالك منها وانت بتنصح
وخد في اعتبارك إن الشخص اللي استشارك في حاجة دا بيقى غرقان ومتعلق فـ قشة اللي هي إنت, أرجوك خلي بالك وإنت بتنصحه, لأنك ممكن تعلقه بنصيحة يصدقها ويطبقها .. تدمره
في النهاية , كل المشاكل صعبة ومستعصية وبتِتعب , لانها في الاول وفي الآخر .. مُشكلة .
