UnderAge

اندر ايدج
يعني ايه اندر ايدج اصلا؟
يعني بشر تحت سن 18 سنة يعني (-18)
واشمعنا 18 سنة
عشان قبل السن دا الدولة مش بتعتبرك مواطن ولا ليك حقوق
إنت مجرد طفل اياً كان سنك مُطالب بالمذاكرة والاجتهاد عشان لما تعدي الـ 18 تفيد البلد
على اساس انك مش هتعرف تفيدها وإنت -18 !!
المهم
الناس الاندر إيدج دول بقى لو نعكشت فيهم
هتلاقي عقول فيهم, يمكن اذكى وألمح من العقليات اللي معدية الـ 18
وافكار مفيدة بجد
بس يامين ينعكش بقى!
لو نعكشت اكتر هتلاقي ان اغلب الثوار اللي كانوا فـ الميدان يوم 25 و 28 يناير كانوا (-18)
آه والله دور إنت بس وملكش دعوة
الفئة العمرية دي بتبقى لذيذة أووي مش من ناحية انها اخر مراحل الطفولة وإنك لسة اهبل وتافه وعيل صغير فتلعب وبتغني وبتمارس كل انواع الحمق إطلاقاً مطلقاً, أبسلولتلي :D
السن دا لذيذ أو ممتع لسبب, إنك مهما عملت إنت قاصر -_-
مهما قولت إنت قاصر ومهما إرتكبت جرايم (مش قتل طبعاً) برضو انت قاصر
إيه قاصر يعني؟
يعني لو عملت مصيبة مهببة مش انت اللي هتتعاقب, أهلك اللي هيتعاقبوا وانت ممكن "ممكـــــــن" تتعاقب معاهم
مين ابن التيت بقى اللي رسخ فكرة إن (-18) يعني طفل؟
جدي وجدك
أيوة فعلا جدي وجدك
اصل ايامهم, كانت البنت بيبقى عندها 16 سنة ولسة عاملة الضفيرتين ولسة لابسة الفستان اللي فوق الركبة وشعرها بيلمع والجزمة السودا أم ابزين وتحتيها الشراب الابيض وشكراً
طب بزمتك, في بنت 16 سنة, دلوقتي كدة؟
دلوقتي البنت 16 سنة ممكن تتجوز!!
إنتي بتتكلمي فـ إيه يا حجة!
المهم;
ايام الابيض واسود فـ التمانينات أو قبل كدة
كانت البنت بمجرد ما تكمل 17 أو 18 سنة بتشوف نفسها كبرت وبرضو المجتمع الباءت بيعاملها بكل سخافة وسخرية وبيحبسها فـ إطار "إنتي لسة صغيرة"
ولما دخلنا فـ الالفية الاولى بدأ يبقى في تحررية فـ الافكار شوية, فبدأ الـ أندر ايدج يشموا نفسهم شوية لكن نفس المجتمع الباءت كبس على نفسهم بـ "العاادات والتقاليد" المصرية العريقة
اياً كان, الفكرة دي دلوقتي اتغيرت, الاندر ايدج مش اطفال
لو إنت أو إنتي معديين الـ 18 ياريت بس تفهموا
إن في عقول يمكن نفس عقولكوا (-18)
ياريت بس والنبي يا جماعة
تفهموا, إن في حاجة اسمها إنترنت دلوقتي
وفي تطور عصر, بلاش تطلعوا اطفالكوا على "إنتي صغيرة أو إنت صغير"
الكلمة دي بتخليهم يحسوا فعلا انهم اطفال ومهما عملوا من انجازات هتفضل إنجازات "أطفـــال"
إنما مثلا لو قلتلهم "أيوة استمروا, دماغكم حلوة, مستقبلكم باهر" بس تكون على حاجة صح يعني مش عمال على بطال
ممكن يطلعوا حاجة مفيدة تفيدكوا نفسكو فـ المستقبل

يا جماعة الأندر إيدج دول كنز مدفوون تحت الرمال
ولسة مالاقاش اللي يكتشفوا

محدثتكم, واحدة من الاندر إيدج :)